ინტერვიუ გიორგი დოლიძესთან, ბრენდჰენდის დამფუნძებელთან.

– რატომ დაიწყეთ ბრენდჰენდი?

– ჩვენი გუნდი ერთერთი საერთაშორისო ორგანიზაციიდან მოდის, იქ მოღვაწეობისას დაგვჭირდა სილიკონის ბრენდირებული სამაჯურები პროექტისთვის, რაც 2012 წელს საქართველოში ვერცერთმა სარეკლამო კომპანიამ ვერ მოგვაწოდა და გაგვიჩნდა იდეა შეგვექმნა სტარტაპი, სწორედ ამიტომ ჰქვია “BrandHand”, ხელის დაბრენდვა…

რა არის მთავარი სირთულე ამ ბიზნესში?

ჩვენთვისაც დაუჯერებელი აღმოჩნდა, რომ სამაჯურებით დაწყებული სტარტაპი ჩვენს თვალწინ იქცა მსხვილ სარეკლამო კომპანიად, რომელიც 3,000-ზე მეტი სახეობის ნახევარ მილიონამდე ერთეულ ბრენდირებად პროდუქტს ქმნის ყოველ წლიურად 1,000-ზე მეტი ბიზნესისთვის საქართველოში, მთავარი სირთულე სწორედ ამ ტემპისთვის აყოლა იყო, როცა შესაძლებლობები იმაზე ბევრად დიდია ვიდრე ჩვენი რესურსები – მაგრამ ვფიქრობ კარგად გავართვით თავი, თუ გავითვალისწინებთ, რომ სტარტაპის ეტაპზე მხოლოდ 320 ლარი გვქონდა.

საიდან გაჩნდა პანტა?

რადგან ბრენდჰენდი კომპანიებსა და ორგანიზაციებს ემსახურება, ჩვენ მუდმივად უარს ვეუბნებოდით სერვისზე ფიზიკურ პირებს, როცა ჩვენი პროდუქცია სასაჩუქრედ სჭირდებოდათ. ამის მიზეზი ფინანსურთან ერთად ტექნიკურიც იყო, რადგან ინდივიდუალურად დიზაინების გენერირება დროში პრობლემატურია. 2017 წელს კი შევქმენით ონლაინ პლატფორმა panta.ge სადაც მომხმარებელი თავად ქმნის საჩუქრის ვიზუალს სასურველი ტექსტითა და გამოსახულებით, ასე შეიქმნა საქართველოში პირველი ონლაინ სასაჩუქრე მაღაზია, დღეს გუგლში რომ სიტყვა “საჩუქარი” ჩაწეროთ პანტა უკვე ერთერთი პირველია, ათობით ათასი ბედნიერი მომხმარებლით.

რას ვერ აკეთებთ დღემდე?

ვფიქრობ, დღემდე ვერ დავარწმუნეთ ბიზნესები და ორგანიზაციები, რომ წლიური შესყიდვების გეგმა წინასწარ გაწერონ და ამით თავიდან აირიდონ როგორც მიწოდების პრობლემები, ისე გააიაფონ ხარჯი ჩვენი მიმართულებით. ეს გარკვეულწილად გამოგვდის ე.წ. ტოპ დამკვეთებთან, მაგრამ სხვა დამკვეთების რაოდენობა იმდენად დიდია რომ მათი დაუგეგმავი შესყიდვების გამო გვიწევს ქაოსური მუშაობა, რაც აქ კომპანიის შიგნითაც როგორც ბექენდში ისე ფრონტენდში იწვევს ბევრ პრობლემას. სამწუხაროდ ბრენდჰენდი არ არის ისეთი ტიპის ბიზნესი, როცა სასურველი პროდუქტი მარტივად იწარმოება – მუდმივად დამოკიდებულია მასალების იმპორტზე ევროპიდან და აზიიდან, საწარმოო პროცესებიც საკმაოდ დელიკატურია, ამიტომ უმნიშვნელოვანესია თადარიგის დაჭერა შეკვეთის განთავსებისას, რასაც დღემდე ვერ მივაღწიეთ დამკვეთებთან.

რა არის კრინტექსი?

იმისთვის, რომ ჩვენი სერვისები მკაფიოდ გამიჯნონ მომხმარებლებმა ვანვითარებთ ე.წ. ქვე-ბრენდებს krintex.com ერთერთია და მოიცავს ფართოფორმატიანი ბეჭდვის სრულ ასორტიმენტს. ბრენდჰენდის საწარმო ამ მიმართულებით 2019 წლიდან აღიჭურვა თანამედროვე დანადგარებით და შესაბამისად ამავე წლიდან გაეშვა კრინტექსი, სადაც ბანერი, სტიკერი თუ კონსტრუქციული სამუშაოები ბევრად ეფექტურად იწარმოება, ვიდრე იმ კომპანიებში სადაც ეს სერვისები შერეულია სხვა ბეჭდვით მომსახურებებთან.

გავიგეთ, რომ თსუ-ს ბრენდ მაღაზია თქვენია, ეს როგორ?

მარტივად, თბილისის სახელმწიფო უნივერსიტეტმა გამოთქვა სურვილი შეექმნა ონლაინ ბრენდ მაღაზია, სადაც ისტორიული უნივერსიტეტის სტუდენტები, თანამშრომლები, აღზრდილები შეძლებდნენ თსუ-ს ბრენდირებულ პროდუქციის შეძენას – რა თქმა უნდა პანტას წლების გამოცდილებით 2021 წელს წარმატებით შედგა ეს პარტნიორობა და შეიქმნა store.tsu.ge, რომელიც ნამდვილად პრესტიჟული პროექტია ჩვენთვის. სხვა უნივერსიტეტების ბრენდ მაღაზიების განვითარებაც იგეგმება და მალე იხილავთ ონლაინ.

ბევრია უკმაყოფილო მომხმარებელი?

ბევრი ნამდვილად არ არის, მაგრამ როცა ამ მასშტაბის საქმიანობაში ხარ გამორიცხულია ყველა კმაყოფილი დარჩეს. ხშირ შემთხვევაში სწორედ დაუგეგმავი და სწრაფი შესყიდვების გამო ხდება გადაცდომები და გაუთვალისწინებელი ამბები, მომხმარებლის შესაბამისი მიდგომის დროს ჩვენი მხრიდან შეცდომები მინიმალურია, თუმცა “მომხმარებელი ყოველთვის მართალია” – ამ პრინციპის ერთგული ვარ და მაქსიმალურად ვცდილობთ ამ რეჟიმშიც მეტი კმაყოფილი მომხმარებლის გულის მოგებას.

მომავალს როგორ ხედავთ?

ნათელს და ოპტიმიზმით სავსეს, ადამიანის ბუნებაა მუდმივი წინსვლა და ჩვენც არ დავიშურებთ ენერგიას, ცოდნას და მონდომებას რომ კიდევ უფრო მეტი და უკეთესი სერვისები შევქმნათ ბეჭდვისა და ბრენდირების სფეროში. მომავალზე ფიქრისას არ შემიძლია არ ავღნიშნო ჩვენი ნაბიჯები ეკოლოგიურად სუფთა პროდუქციის დანერგვის კუთხით, ბრენდჰენდი მაქსიმალურად ცდილობს ბუნებისთვის უვნებელი პროდუქციის წარმოებას და ამ მიმართულებით კიდევ უფრო მეტს ვიმუშავებთ.

თქვენი გზავნილი კონკურენტებს?

ჩვენ არ გვყავს კონკურენტები, ჩვენ გვყავს პარტნიორები. პირადად ვიცნობ და ვმეგობრობ სხვა კომპანიებთან ჩვენს სფეროში, ედვინგსი, პროლუქი, ბესტსაბი, სოლვეი და სხვები, ძალიან კარგი ხალხია და ცდილობენ ამ ბიზნესში სიახლეებისა და ინოვაციების დანერგვას, ჩვენც მათთან ერთად მივაღწევთ უფრო მეტ წარმატებას, თანამშრომლობის რეჟიმში.